الأربعاء، 25 فبراير 2009

تعـالـوا ....نتفـق!!!




السلام عليكم ورحمه الله وبركاته...



ألم نتفق...؟؟؟
لابد أن نتفق...
ووراك ..وراك... يا فشكول... والزمن طويل!!!
وطويل قوي ...حتي نتفق!!!
الحوار مع الاستاذ/احمد... صلاح..( العم فشكول ) ممتع ومثمر، ولا يختلف أثنين على محبه العم فشكول...ولأني أحبه أختلف معه في كثير من المواقف. وقبل أن نتحدث عن الخلافات لابد أن نتحدث عن الأتفاقات ...نقاط اساسيه لا نختلف عليها ، ولا يختلف أحد معنا عليها.
العم فشكول كالعطر المعتق...كلما مر عليه الزمن زاده قيمه. يحدثنا بلغه اليوم عن الماضي ...بموضوعيه شديده جدا وان كان ينحاز احيانا لحبيب له من الشخصيات التاريخيه ( كصلاح الدين ) مثلا ...لتشابه الأسماء... كما يصرح بلا خجل ولا وجل برأيه و رؤيته الصريحه في الاحداث الجاريه علي الساحه في حياتنا اليوميه. وهي دائما رؤيه خبير محنك .
يهتم بكل كلمه يقولها ، وان كان المتلقي شابا وصلته بلغه الشباب ، اما ان كان ( زي حلاتي ) لن تصله ابدا...أريد أن أقول أنه يتحدث بلغه تلاميذه ومريديه . هذا ...من ناحيه الكلمه ...أما عنه وتلاميذه ومريديه فهو لا يهمل ولا يترك واحدا منهم دون أن يزوره ويسأل عليه ويقرأ موضوعاته ويعلق عليها بأسلوبه الساحر الساخر ...حتي هوهو ... كان له نصيب ونصيب كبير في أهتمامات العم فشكول...

شكل وفشكل كثير من التدوينات والأحداث بتكوين ثنائي غير ملحوظ مع العزيز..( الكحيان ) قبل ان يختفي ...وأظن انه هو السبب في طفشان الكحيان وسوسه...وغيابهما بلا شك له تأثير كبير علي المدونين الكحيانين المسوسين أمثالي...
ربما يسأل أحدهم ...ليه الكلام ده عن فشكوووول؟

السبب الأول: ناوي يترشح في الأنتخابات ...وعقبال عندكم جميعا طمعان أو عشمان في حاجه صغيره أد كده ....يعطيها لي بعد ما ينجح ان شاء الله ...وأنا متأكد أنه لن يبخل علينا جميعا ...وراح يعملنا ( نت) لوحدنا بعيدا عن غلاسه المغلسين. بيقول أنه سيكون أسرع من الطياره النفاسه .

السبب الثاني: أنه يستحق التكريم ...ورأيت أن أحتفل به ...ولو لوحدي !!

السبب الثالث: لأسأله ...و أسألكم ...هل أتفقنا ؟؟
*** *** ***
تحديث أول:ــ
نجح فركشاوي في فشكله فشكول..وقبل أن تقول ..أقرأ تعليق فشكول!!
الخميس:26\2\2009م
***
تحديث ثاني:ــ
نظرا لشراسه الحرب الدائره التي شنها( فشكول) من شمال البلاد علي( فركشاوي) الغلبان الي مالوش مكان تدخلت المساعي الحميده بين الطرفين ومازال التهديد مستمرا...فركشاوي ...يعرض الصلح وفشكول مصر علي ان مصر بلدهم لوحدهم ولازم فركشاوي يطلع بره...فركشاوي يستعرض عضلاته ويصرع أسدا ميتا .
****
نوافيكم اولا بأول بنتائج الحرب الطاحنه
****
تحديث ثالث:ــ
الاستاذ/أحمد عمر يعرض علي طرفي النزاع حل المشاكل بلا فشاكل ولا فراكيش ...ويطرح ورقه عمل وذلك بعد دراسه الموضوع ، وعرضه علي الطرفين.
* الأزهري: قال انه سيصلي المغرب ويعود...وحتي الآن لم يعود.
الجمعه :ــ 27\2\2009م
***
تحديث رابع :ــ
أجمل تعليق
محمد الجرايحى يقول...
أستاذنا الجميل : أحمد أبو زيد ( فشكوووول)السلام عليكم ورحمة الله وبركاتهالمنايفة حبايبنا وتاج راسنا بس أعمل معروف بلاش حكاية الثالث والرابع كفاية حرام ....
***






هناك 30 تعليقًا:

فشكووول يقول...

السلام عليكم ورحمة الله ..
العزيز فركشاوى ناوى .. تحياتى
تعالى فركش وانا افشكل لحد ما حنخربها ونقعد على تلها..
اولا يا عزيزى فركش .. اشكرك جدا وكلى امتناى لك لاعطائى هذه المساحة التى انا دونها....
واليك شخصيتى الحقيقيه التى تعرفها ولكن اغلب المدونين لا يعرفونها .. انا اسمى الحقيقى احمد ابوزيد من شبين الكوم منوفيه .. وكونى منوفى بيزعل ناس كتير عشان المنايفه مش محبوبين قوى ولو ان هذه فكره خاطئه عن المنايفه وربما يكون هناك وقت آخر لنتحدث فيه عن هذا الموضوع ولكن ما يهمنا فيه ان المنايفه وانا منهم فى اغلب الاحيان صرحاء مع النفس ومع الغير (بيسموهم بتوع مقالب)اما اسم صلاح فهو اسم الشهره .. ولهذا موضوع (اصل يا سيدى انا مولود قبل 16/1/1952 وكانت زوجة الملك فاروق حامل فى احمد فؤاد فعملوا اعلان عشان اللى يتولد فى يوم مولد ولى العهد حيدوه عشره جنيه .. وبعدين ابويا وامى اخرونى شوية ايام عشان يكتبونى يوم ميلاد ولى العهد وياخدوا العشره جنيه .. والاخر خدوا بمبه وكان اسمى قبل الاعلان عن الجايزه صلاح .. عشان كدا لزق صلاح .. اما احمد فهو اسم المعاملات الرسميه وشهاده الميلاد والجيش والكليه والمدرسه وخلافه
ومن جوانب الاتفاق فانت بارك الله فيك قلت فى شعرا ونرا .. الامر الذى احمله جميلا يثقل كاهلى ويجعلنى مدينا لك
ثانيا : والله يا فركش انا مصرى مسلم عربى .. احب كل شبر فى ارض مصر واحب كل فرد واحب كل شجره وكل حيوان وكل عصفور وطائر يطير على ارض مصر واعشق هذه الارض واعشق طينها وترابها واعشق هوائها وكل تفسيلاتها .. وفى نفس الوقت لا اطيقها ولا اطيق كرهها لابنائها وايضا لا اطيق ظلمها ولا تسلط ابناؤها على ابناؤها .. من خبرات التاريخ وتجاربه اجدنى يا ئسا ومحبطا وقانطا منها .. فهل كتب الله عليها ان تكون البلد الظالم لاهله .. البلد التى تلفظ شعبها ... التى تغرقهم فى البحر فرارا من ظلمها وجبروتها عليهم.. وفى نفس الوقت رقتها وحنانها مع الاغراب .. لن ندخل فى تفصيلات ليس هنامجالها ولكن اقسو فى نقدها من حثرة حبى لها ولاهلها الذين ايضا اكرههم فى نفس الوقت من اعمالهم .. والحمد لله انا متيسر ولكن لا اضمن لابنائى الغد.
ثالثا: يا فركش يا عجوز .. عرفتها دى مقى من كتاباتك ومن تعليقاتك على الاحداث .. اصل فشكول ساعات اما ربنا يتجلى عليه يلقطها وهى طايره اما فى الاغلب الاعم .. فشكول غبى وما بيفهمش ... هه هه هه شوية ضحك
رابعا : كان نفسى نعطى هذا البلد العظيم .. الكبير .. الفطحل (حلوه دى؟) الضاربه حضارته فى اعماق اعماق التاريخ .. الذى علم العالم الحضاره كان نفسى نعطيه قدرا من اهتمامنا ومن محبتنا فيشب ويقوى ويقف بين الامم شامخا .. ناهضا وليس هكذا .. بلد يتسول كل شيئ.. شفت آخر تمخيخه .. مضاعفة رسوم القضايا فى المحاكم..هذه التماخيخ يا اخى لا تعجبنى .. ناس تسهر بليل تشرب هباب بتاع الدخان الازرق ده وتقعد تمخخ لنا عشان تقرفنا فى حياتنا .. والصبح تلاقى قوانين بتدق على دماغنا .. ليس هكذا تسير الامم .. نريد ان نسير بهذا البلد بالاسلوب العلمى والمنهجى والمؤسسى .. لا باسلوب التماخيخ وبرقبتى ياريس .. ولا يهمك انت معاك ناس زى الفل.. والكلام الاهطل ده عايزين العلم وليس باسلوب العربيه الكاروا التى يجرها حمار او حصان وعندما تثقل الحموله ترجع العربه القهقرى .. حلوه القهقرى دى .. فاكر ايام النكسه .. وفاكر النكته اللى كانت بتقول للعسكرى فى الاتوبيس او القطر .. انسحب يا عسكرى.. عشان عملنا حرب باسلوب (برقبتى يا ريس)
خامسا حزنت كثيرا على انسحاب الكحيان من التدوين وكذا حزنت على انسحاب سوسه النوسه كونوسه واعتقد ان انسحابهما الاثنين فى وقت متزامن له علاقه ببعضهم.. والله اعلم .. ولو ان الله لم يتركنى وحيدا فبعث لى بفركشاوى ناوى ليؤنسنى فى عالم المدونين.
سادسا : انا حايش لك وظيفه حلوه .. وزير دولة المدونين ان شاء الله بعد ما انجح وابقى ظاظا بس لازم تدفع لى رشوه كبيره عشان تقدر تاخد الوظيفه دى .. منوفى بقى

يا عزيزى يا فركشاوى ناوى
اعجز عن شكرك واعجز عن تقديرك وكلى تقدير لك .. وبارك الله فيك .. وربا يستر فى الاختلافات اللى اعتقد ان لها بوست قادم ..ربنا يستر .. لكن قلبى مفتوح لك .. متهيأ لى التعليق بوست كامل : وتحياتى

فشكووول يقول...

يعنى دا كمين وانا المنوفى شربت المقلب وفشكلتنى وكمان فركشتنى .. ماشى يا فركش .. انا وراك والزمن طويل

فشكووول يقول...

اظن انت فاكر انى حاسيبك فى حالك .. انا اعلنت الحرب عليك فى مدونتى وفركشت كل مواضيعك

Unknown يقول...

بسم الله الرحمن الرحيم
فشكوووول ...يا غوووول وقعت وقبل ما تقع انا سميت عليك .
لا ...اوعي ازعل منك انا مخضوض خلقه تخضني لأ....
وعموما انا مسالم مش بتاع حرب أنت الي أعلنت الحرب ...انسحب ..أنسحب أحسن لك ...هاضرب في المليان
أنا أعلنت عليك الحب
======فركشاوي ...نوي===

رئيس التحرير يقول...

بسم الله الرحمن الرحيم
فركشاوي...السلام عليكم ورحمه الله وبركاته.
هدي السر يا فركشاوي وخليك عاقل السلام والسلام ثم السلام يا فركشاوي اوعي تقل عقل وتعمل اللي انت ناوي عليه!!!
وبعدين كلمه في سرك ...دول جماعه تقال خالص 2رئاسه جمهوريه والقادم ان شاء الله ورتب ايه ...رتب للركب لم الموضوع يا فركشاوي أحسن !!!
سلام بقي ...اوي تفكر اني معاك ضد فشكول ....لا دا فشكول حبيبي..
سلام بقي!!!

عمرو جويلى يقول...

السلام عليكم
الأخ فركشاوى
كدة ياراجل كدة تصطاد أكبر راس فى البلد وكمان المنوفى الكبير أنا زعلان منك خالص يا فركشاوى وكل المنايفة زعلانين ومصممين يقتلوك إلحق إهرب بجلدك من هنا
تحياتى

الازهرى يقول...

السلام عليكم ورحمة الله وبركاته
انا جاى من عند فشكول وكنت منبطح وباسحف طول الطريق خايف من ضرب النار والنار الصديقة وخلافة
انا قلت الحرب قامت لكن فى الاخر اكشفت انها حرب اعلامية وراها مكااسب سياسية ومصالح انتخابات وحكم عليا
طيب بما انى اطمنت عليكم وانكم بخير اروح الحق صلاة المغرب

سلام

أمل حمدي يقول...

فركشاوي وفشكول الاتنين اغلى الغالين

أنا داخلة أسلم وسلام

فشكووول يقول...

شوف ناس كتير معايا .. اصلهم بيخافوا من المنايفه .. شوف رئيس التحرير وصفاء واحمد , واللى خايف على نفسه ينسحب واللى مش خايف ذنبه على جنبه .. انا حذرت ونوعت وقد اذعر من اعذر
شفت رئيس التحرير عاقل ازاى وبينصحك نصيحه لله .. 2 رئيس جمهوريه والتالث فى السكه والرابع فى بطن امه.. واللواءات على قفا مين يشيل .. سلم سلاحك خلاص ما لكش فرصه تانيه .. المكان كله محاصر

غير معرف يقول...

السلام عليكم و رحمة الله و بركاته


طبعا بعدما قرأت رساله فركشاوى اللى بعتها لفشكول و اللى كل الناس بلا فخر ما فهمت شئ خالص

نصحنى عم فشكول بانى اتابعكم و لانى مطيع جدااا-اسمى احمد ف الحقيقه ^_^- فجيت اتابعكم و الحمد لله اطمنكم ..






لازلت برضه ما فاهم شئ


اللى عاوز بس افهمه


فين المشكله ×_*

انتو قوليلى ع الاختلاف و انا اقول ع طول ×_×


الظاهر كده انكم عاوزين المخبر كولومبو ^-^

متابع ان شاء الله

Unknown يقول...
أزال المؤلف هذا التعليق.
Unknown يقول...

الاستاذ/أحمد عمر
وعليكم السلام ورحمه الله وبركاته...
لقددخلت مدونتكم وكتبت تعليق وبعد ساعه من المحاولات فشلت والحمد لله ...عم فشكول بيحاربني بكل انواع الاسلحه.
سعدت جدا بزيارتكم لمدونتي المتواضعه.والتي دخلها الشرف بدخولكم ..
ومن عجائب تصانيف القدر ان الموضوع الذي طرحتموه في مدونتكم بأننا عاطفيون ولا نستخدم العقل في كل امورنا ...هو لب المعركه الطاحنه بين فشكول وفركشاوي...
والموضوع بأختصار شديد جدا...
في مجموعه تدوينات سابقه أقترحت ان علي عمنا فشكول ان نتفق ...فقال لي عمي فشكول ( نتفق..علي ايه؟ دا عشم ابليس في الجنه !!)ودار الحوار انا عايز اتفق وهو يقولي عشم ابليس في الجنه الي ان تطورت الاحداث لهذه الحرب المدمره ...انا بقوله بحبك ...وهو يقولي اعلنت الحرب عليك ..مستقوي عليا قوي....قول بقي انت يا عم احمد ...
وانت احمد كمان .....يااااااااه
اروح لمين؟
======سيدي الفاضل ارجو ان اكون وضحت الرؤيه ...سعدنا بتواصلك معنا.

فشكووول يقول...

فينك يا استاذ يا احمد عمر .. تعالى بقى واناموافق على وقف اطلاق النار وبعدين نقعد ونتفاوض .. بسرعه شويه الله يخليك تعالى بقى

شمس النهار يقول...

هو في ايه انا مش فهمانه حاجه
هو في لاسمح الله خناقه هنا

شمس النهار يقول...

ايه ده انا فعلا مش فهمانه خالص
هو في ايه ياجماعه

بس خلاص ... يقول...

فركشاوى....... يابطل
ايه اللى انت عملته ده الموقف جد صعيب وخلاص المسائل اتفركشت واتفشكلت وماعدش ينفع فيها بس خلاص
بس انا باقولك ووووووولايهمك
شد حيلك واوعى تسمع كلام عمنا رئيس التحرير وتخاف .. انتم الاتنين حبايبنا وانا باحب اهدى النفوس
هو يعمل بوست يفشكل انت تعمل بوست يفركش
ايوه كده خليها تحلو .....
ايه ده قنابل ومرفقعات ..بعد ازنك فريرة جرى ..........

غير معرف يقول...

أخى الغالى الكريم : فركشاوى
لسلام عليكم ورحمة الله وبركاته
أولاً حمداً لله على عوتك لمدونتك وقرائك وأحبابك...
وإن شاء الله تواصل بلا فواصل

وأتمنى أن تدوم الأخوة الصادقة بينا جميعاً
ومن خلال مدونتك أقدم خالص تقديرى لعمنا الكبير : فشكوووول

وجميل هذا اللقاء
لقاء السحاب

أخوكم
محمد

Unknown يقول...

بسم الله الرحمن الرحيم
الحاجه / شمس ....السلام عليكم ورحمه الله وبركاته.
الموضوع ببساطه كتبت البوست الي حضرتك قرتيه...لاقيت ...( كح كح.. آآآآتشي الحمد لله...غفر الله لنا ولكم)عمي فشكول عامل بوست تاني ...وبيعلن الحرب علي ..هو يقول اعلنت عليك الحرب ...وانا غلبان بقول أعلنت عليك الحب ...ونازل ضرب قنابل وكيماويات و...انا في المشتفشي...كح كح

غير معرف يقول...

السلام عليكم و رحمة الله


عم فركشاوى .. ناوى ..

يرضيك
عم فشكول اعلن تهدئه من جانب واحد و رفع الرايه البيضاء قبل ما ادخل واصلح بنكم ؟!!!

لكن طبعا و اكيد ولازم و واجب انه عمل كده لما عرف انى هدخل نهاااااى ^_^

ف سرك

نقول مبروك- عم فشكول عيب انا بقول لعم فركشاوى كلمه فسره بلاش كده ×_* -

كراكيب يقول...

انت خضتني
اه والله اتخضيت من ردك اللي عندي
قعدت اقراه كذا مرة كدة
واقول هو كلامه ده يعني حاجة كويسة واللا انا زفت واللا ايه

فركشاااااااوي
اقرا المعوذتين كدة
انتوا اتحسدتوا يا ولاد
وقولت ندخل ننام بقى علشان في مدارس بكرة... الله

miro el niro kwaniro

david santos يقول...

Excellent posting, my friend, excellent.
Have a nice weekend.

فشكووول يقول...

يرحمكم الله .. خلاص متصالحين .. صافى يا لبن
اصل الجماعه المدونين فرحانين فينا قوى وعايزين يشعلوها ويشوفوا فيها دم ونيابه وبوليس وحاجات كتير كدا
بس ايه رأيك نخلى نقبهم ييجى على شونه وانا من امبارح عملت وقف لاطلاق النار من جانب واحد .. وعايزين بقى نروح نقعد فى خيمه ونتفاوض على الصلح عشان ما نشمتش العدا فينا
خلاص صافى يالبن
قول حليب يا قشطه

صفــــاء يقول...

.
لالالا بس بقى خلاص انتو الاتنين مش كدة يعنى
عيب حتى كبرو حد والا احترمو الناس اللى قربت تبوس على روسكم دى
تصدق بالله
برضه لحد دلوقتى مش فاهمه فيه ايه
وبعد ما هددتنى عند عمنا فشكول وانا كنت حالفه براس كبير الراحيميه انى أخد بتارى قصرت الشر احسن وقولت الم الدور احسن انتو مش ناقصين حروب ومعارك
بص من الاخر كدة يا تعلنو الهدنه
أو تشنو حرب شامله شعواء مينفعش كدة
بلاش المناوشات دى
انا عاوزة دم ... دم
او تقولو الطيب احسن وترحمونا من المعركه اللى محدش فاهم لها دى
.

بس خلاص ... يقول...

فركش
عمنا فشكول عارض الصلح انت هتوافق ولا ايه
طمنى الله يخليك ..يرحمكم الله

فشكووول يقول...

خد بالك .. بس خلاص عايزه تولع الموضوع وعايزه تفشكل الصلح بينا .. انا نبهتك آهه قبل هى ما تيجى
تحياتى

غير معرف يقول...

فركشاوي
اول مرة ادخل لمدونتك من خلال مدونة عمي صلاح ابوزيد
فعلا فعم صلاح بيستحق التكريم لانه شخصية حبوبة و فريدة لما اتعرفت عليه من خلال مدونته عجبتني كثير و طريقتو في التحرير
بس لما اتواصلت معاه عبر الايميل عجبني اكثر لبساطته و تواضعه
اتمنى ان الحرب ما توضع اوزارها علشان نستفيد نخن مريدي و تلامذة فشكول في التقرب اكثر من شخصيته
مودتي
دعوة للتواصل مع مدونتي

كلنا مقاومة يقول...

السلام عليكم

أستاذنا فركشاوي

يعني يا أستاذنا لا موجود على المدونة بانر مدونة كلنا مقاومة ولا تنويه عنها ولا موجودة وسط المدونات الصديقة ولا بتزورنا

مش حضرتك قلت انك معانا ؟

أنا جاية أفكرك
وأسال الله أن يديم محبتك للأستاذ فشكول فالاختلاف في الرأى لا يفسد للود قضية
وأنا كده ضربت عصفورين بحجر جيت أفكرك وأشترك في تكريمك للاستاذ فشكول

مجداوية ,,وعاشق النقاب
كلنا مقاومة

Soul.o0o.Whisper يقول...

السلام عليكم و رحمة الله و بركاته

أول زيارة لمدونة حضرتك
و داخلة من الباب الورانى

أصلى لقيت الباب الادمانى ذاخر بكل مالذو طاب من انواع الاسلحة


و رغم إنى حاولت اعرف فيه ايه
لكن بأحاول أجيبها و هى طايرة

بس هى تقريبا البنزين خلصان فمش عارفة تطير



المهم
ياريت تقول تفاصيل كمان شوية
عشان مش قادرة الم الموضوع اوى

و كمان عمو فشكول اعلن الاستسلام
و رفع الراية البيضا
ياللا انت كمان اقبل السلام
و فضوها بئا

عاوزين نصحصح للمعركة التانية
احنا هنفضل على طول فى دى ولا ايه
(( بأحب أهدى النفوس بس



دمت بود
و تقبل مرورى

جلال كمال الجربانى يقول...

السلام عليكم ورحمته وبركاته

أعتذر للغياب وحشتنى والله

وبعدين أغيب شويه الاقى العلاقات متفشكله وومتفركشه والمشكله أن الدولتين حبايبى والعلاقات معهم عال العال ومضطر أبقى تبع مدونات عدم الأنحياز
ومهما كانت الأسباب الصلح خير والسلام بينكم لازم يبفى خيار أستراتيجى

ولا عايزين تقضوها مفاوضات وتحرمونا
من بوستاتكم الرائعه التى ننتظرها وبنطخ لها المشاوير .. السلام ياقوم

******وإليكم البيان التالى******
الصادر من الهيئه العليا لعدم الأنحياز التدوينى وننتظر أعلان فورى من كلا الطرفين بتهدئه الأجواء إعلامياً وسحب القوات من على الحدود وسحب جمبع أسلحه الدمار الشامل والجزئى والترللى توطئهً حلوه توطئهً دى لتطبيع العلاقات كمرحله أولى سريعاًوفوراً
توطئهً تانى لعوده العلاقات الكامله بين مدونتى الغالى فشكول دوت كوم والحبيب فركشاوى ناوى
وينشر هذا القرار على الصفحه الأولى بكلا المدونتين لأثبات النوايا الحسنه من كلا الطرفين ولقد أعذر من أنذر
وجارى البحث فى العقوبات التى ستوقع على مخالف هذا القرار
واسعه شويه دى عدوها
ودمتم جميعاً بخير

والسلام عليكم ورحمه الله وبركاته

رحلتنا في الحياة يقول...

كده فهمت البوست الاخير اللى فى المدونة هناك :)