الخميس، 14 يناير، 2010

كـلام ...فـخامـته

كلام فخامته...
يا شعبي حبيبي
يا روحي يا بيبي
يا حاطك في جيبي
يابن الحلال..
يا شعبي يا شاطر
يا جابر خواطر
يا ساكن مقابر
وصابر وعال..
يا واكل سمومك
يا بايع هدومك
يا حامل همومك
وشايل جبال..
يا شعبي اللي نايم
وسارح وهايم
وفي الفقر عايم
وحاله ده حال..

أحبك محشش
مفرفش مطنش
ودايخ مدروخ وآخر انسطال..
أحبك مكبر
دماغك مخدر
ممشي أمورك كده باتكال..
وأحب اللي شايف
وعارف وخايف
وبالع لسانه وكاتم مقال..
وأحب اللي راضي
وأحب اللي فاضي
وأحب اللي عايز يربي العيال..
وأحب اللي يائس
وأحب اللي بائس
وأحب اللي محبط وشايف محال..

وأحبك تسافر
وتبعد تهاجر
وتبعت فلوسك دولار أو ريال..
وأحبك تطبل
تهلل تهبل
عشان ماتش كورة وفيلم ومقال..
وأحبك تأيد
تعضد تمجد
توافق تنافق
وتلحس نعال..
لكن لو تفكر
تخطط تقرر
تشغلي مخك وتفتح جدال..
وتبدأ تشاكل
وتعمل مشاكل
وتنكش مسائل
وتسأل سؤال..

وعايز تنور
وعايز تطور
وتعملي روحك مفرد رجال..
ساعتها ح أجيبك
لا يمكن أسيبك
وراح تبقي عبرة وتصبح مثال..
ح أبهدل جنابك
وأذل اللي جابك
وحيكون عذابك ده فوق الاحتمال..
وأمرمط سعادتك
وأهزأ سيادتك
وأخلي كرامتك في حالة هزال..
وتلبس قضية
وتصبح رزية
وباقي حياتك تعيش في انعزال..
ح تقبل ح أحبك
ح ترفض ح ألبك
ح تطلع ح تنزل ح أجيبلك جمااااال.
لا ووِِِِ النبي ...كُله إلا كِده ...
الكلمات منقوله ...تأليف واحد تاني ...
فركشاوي معجب بيها أوي عطش الصبار يقول...

القصيده دى لااحمد فؤاد

نجم
هنا(http://hawhawno.blogspot.com/ )واحده تانيه
..فركشوها.

هناك 36 تعليقًا:

Sharm يقول...

حد يقدر يعلق !!


شارم لايف
www.sharmlifeblog.com

عطش الصبار يقول...

مش عارفه ااقول ايه
الشاعر لخص حاله الشعب فى قصيده
شر
البليه مايضحك
لاووووووالنبى كله الا كده
احنا اصلا بقينا فى حاله هزال من غير حاجه وبعدين شوف بيحبونا ازاى فى كل الحالات
عارف اول لما قريت القصيده يا فركشاوى جتلى نوبه ضحك هستيرى وكائنى اول مره اشوفها
فعلا احنا بقينا كدا بالضبط
تحياتى

أمل حمدي يقول...

ههههههههههههه

ماشي يا فركشاوي

ابقى طمنا عليك

ههههههههه

فركشاوي ..ناوي يقول...

Sharm...
الخوافين بس مايقروش...

فركشاوي ..ناوي يقول...

سيدتي الفاضله ...
عطش الصبار ...
بيحبونا مووووووت ...
واحنا بنمممممموت تحتيهم .

فركشاوي ..ناوي يقول...

أمل حمدي...
ماما أموله ..
ما تخافيش...
هم مش فاضيين لنا اليومين دول
مشغوليين بالجدار الفولازي !!!!

فشكووول يقول...

كله الا كدا زاى يعنى

دا كده والف كده واذا مش عاجبك انت عارف ايه اللى حيحصل .. ما احنا قلنا اييييه :
وعايز تنور وعايز تطور وتعملي روحك مفرد رجال.. ساعتها ح أجيبك لا يمكن أسيبك وراح تبقي عبرة وتصبح مثال.. ح أبهدل جنابك وأذل اللي جابك وحيكون عذابك ده فوق الاحتمال.. وأمرمط سعادتك وأهزأ سيادتك وأخلي كرامتك في حالة هزال.. وتلبس قضية وتصبح رزية وباقي حياتك تعيش في انعزال ..

طب ما انت عارف آهه .. لكن لو ترضى برضه انت عارف
احنا عندنا كل حاجه .. عندنا سيف المعز وذهبه .. تقبل تاخد ذهب المعز .. بس بشرط فى المنام .. مش بجد يعنى .. ترفض ليلتك سوده عندنا سيف المعز برضه .. بس المره دى مش فى المنام .. المره دى فى الحقيقه

شفت اللى حصل لايمن نور يا عينى ما سابهوش الا لما طلقوا مراته منه ولسه مش عارفين حيعملوا فيه ايه

وربنا يسترها على البرادعى ولا كمان عمرو موسى .

حنين يقول...

ايه الكلام الجامد ده بس يا استاذ فركشاوى
بس بجد حلو جدا ويستحق فركشه
تحياتى حنين

Tamer Nabil يقول...

كلام جامد

وكلنا زيك بنقول كلة الا دة

ربنا يوفقك ويكرمك

مع خالص تحياتى

شمس النهار يقول...

شامومكن ابدا
لازم ولابد اعرف مين الرايق

اللي كتب الكلام ده

::))

سلااااااام

عطش الصبار يقول...

القصيده دى لااحمد فؤاد نجم

مضحكة يقول...

10/10 يا معلم كلام حلو يا فركشاوي :-)

واحد من العمال يقول...

السلام عليكم

هذه القصيده سمعتها على جوال أحد زملائى وكان الذى يلقى القصيده بيلقيها بكل أعصابه
وكان ألذ ما فيها حركات الوعيد والتهديد عندما قال
تطلع ح تنزل ح أجيبلك جمااااال
بس فعلاً ده أسلوب نجم

ودمت بخير حال

فركشاوي ..ناوي يقول...

فشكول ...
الله يبرك ...

فركشاوي ..ناوي يقول...

حنين :
دا مش كلامي ...
شكرا...لكم

فركشاوي ..ناوي يقول...

Tamer Nabil:
كله بيقول يا عمنا
ويوفقك كمان

فركشاوي ..ناوي يقول...

شمس النهار:
قالوا لك ع الريئ

فركشاوي ..ناوي يقول...

عطش الصبار :
شكراً...
الكل عايز يعرف بتاعت مين .

فركشاوي ..ناوي يقول...

مضحكة:
والله الضحك ما شفناه من زمان
هل هلالك ...والسعد جالك

فركشاوي ..ناوي يقول...

واحد من العمال :
وعليكم السلام ورحمه الله وبركاته ...
شرفتنا اخي الحبيب ...
ويا ما ها نسمع..
سلامي.

محمد الجرايحى يقول...

أخى الكريم
السلام عليكم ورحمة الله وبركاته
أحييك على حسن الاختيار
فى النقل الجيد أيضاً إبداع

تقبل تقديرى واحترامى
وبارك الله فيك وأعزك
أخوك
محمد

جايدا العزيزي يقول...

كلامات تشرح لنا ما يدور فى البلد


من فساد والشعب هو المجنى عليه


يا عينى على شعب مصر


انا سعيدة لانى اتابع معكم


تحياتى

ظل السماء يقول...

أحلى ما في الكلام إنو واقعي بجد.. و مش بس الحال هادا في مصر,
للأسف كُل الدول العربية صارت هيك!!!
و الشعوب هي اللي بتدفع التمن..

بس الكلام.. مش عارفة أقول عنو حلو لأنو فعلاً, شرُ البلية ما يُضحك!
يعني مش عارفة أضحك عالأسلوب الطريف الساخر اللي فيه, و الا أحزن عالواقع اللي إحنا فيه?!!!

عالعموم تسلم إيدك عالنشر :)
سلامي..

Mr.Hazem يقول...

كلمات تلخص ما يتمناه رؤسائنا الأكارم بشعوبهم الغلبانه
فعلاً شر البلية ما يضحك متل ما قال " عطش الصبار "
المشكلة انه رغم كل اللي بصير حوالينا الا انه لساتها شعوبنا كمان غير مبالية ,
فبصراحه ومن وجهة نظري نستاهل اللي بصيرلنا

يعطيك العافية يا استاذي

دودي فلسطين يقول...

هههههههههه

والله حلوه القصيده او انها من الواقع
ربنا يشقلبها علشان نشوف قصيده تانيه واحلى لشعب مصر وباقي شعوب
العالم

تحياتي دودي فلسطين
لفركشاوي

عفوا أنا أميرة يقول...

السلام عليكم ورحمة الله وبركاته
أول مره اتشرف بدخول مدونتك عجبنى جدااا الزجل دا أحمد فؤاد نجم عبقري فعلا لخص الحكاية كلها فى كلمات بسيطه وسهله رااااائعه فعلا تسلم ايدك نقل موفق جداا

فركشاوي ..ناوي يقول...

صديقي العزيز / محمد الجرايحي
وعليكم السلام ورحمه الله وبركاته...
وايضا في حرصكم الشديد علي متابعتنا رغم تقصيرنا في حقكم...أبداع وقد تعلمنا منكم الكثير استاذنا الكريم
تحيتي وتقديري.

فركشاوي ..ناوي يقول...

جايدا العزيزي:
شعب مصر يستحق الأعجاب به ...لا الشفقه عليه ...هو شعب يعرف جيدا طريقه الي الله .
بشكركم علي متابعتكم والتي تزيدنا بهجه وسرور.

فركشاوي ..ناوي يقول...

ظل السماء:
اهلا بالزائر صاحب المكان ...
لا تحتاري ...فحالنا صار كما قال الشاعر من زمن بعيد :
غير مجدٍ في ملتي و أعتقادي ...
نوح باك أو ترنم شــــادي .
ابكت يلكم الحمامه أم غنت ..
علي غصن فرعها الميادي .
لا فرق بين الضحك و البكا ...
في كلا الأمرين تنهمر الدموع .
شكرا لمشاركتكم الغاليه ...

فركشاوي ..ناوي يقول...

Mr.Hazem...
اهلاً بك أبن فلسطين الحبيبه
عزيزي ...قال القائل ( مِن أنفسكم سُلط عليكم ).
هو الأبتلاء ...لنستحق ما نستحق من الجزاء.
تحيتي و تقديري ..

فركشاوي ..ناوي يقول...

دودي فلسطين:
انشاء الله نشوف كل ما يخطر ببالنا في الجنه ان شاء الله .
تحياتي لأهل القدس والخليل ..
وكل المدن الفلسطينيه الصامده .

فركشاوي ..ناوي يقول...

عفوا أنا أميرة :
عفواً انا فقير ...عجبتني جداً زيارتك لمدونتي انا بفرح لمل الاقي مدونات محترمه كما هي مدونتك ...
حتماً انت بالفعل (أميره )

saheda.com يقول...

اخوانى فى الله

اخوانى الكتاب والعظماء والمفكرين
اخوانى المدونين والصحفين
اخى اختى فى العمل
اخى واختى فى الشارع
اخى واختى فى المسجد
اخى واختى فى كل مكان وزمان
ان الاوان ان نصنع المجد بايدينا
ان الاوان نجاهد مع اخواننا
ان الاوان ان نفيق من الثبات الكبير
ان الاوان ان نتغير ونغير
ان الاوان ان نتحدث مع الناس بحديث مختلف
ان الاوان ان نقف ونصحح الاوضاع بدل استنكار والرفض
فكلا منا له قلمه فليكتب
ويراسل كل الصحف
كلا منا يرسل رسائل للقنوات الفضائية
كلا منايراسل الكتاب والمفكرين
كلا منا يكلم خطباء المساجد
كلا منا يكلم اهله واهل شارعه
كلا منا يكلم زملاء العمل والدراسة
كلا منا يكلم تلميذه فى المدرسة والمعاهد
كلا منا يكلم الناس فى الباص والقطاروغيره
كلا منا يبذل جهدا
كلا منا يستيقظ
كلا منا يبنى له جدار عز وكرامة
كلا منا يبنى جدار يكون له شفيعا من النار
كلا منا يدون ويدون الى ان يفهم الناس
هذه حرب لاتضع فيها الاسلحة ابدا
كلا منا سلاحه الايمان
كلا منا يطلب الجنة
كلا منا لايترك سلاحه الا عندما تنتهى الحرب
اما نصر او استشهاد
اخوتى كلكم مسئولون امام الله
فلنجعلها حربا عالمية فلنراسل الصحف العالمية
والقنوات العالمية
والمدونات الغربية
من منكم معى
من منكم يبنى جدار العز والكراة
من منكم يفك الحصار عن غزة
من منكم لاخوانكم فى غزة
من منكم لنصرة الاقصى
من منكم
يكن مع اسماعيل هنية وابوعبيدة
فى ساحة الجهاد
من منكم يحب الجنة والشهادة
فلينضمن الينا
صانعوا جدار العز والكرامة

فركشاوي ..ناوي يقول...

saheda.com
نحن نبني معكم هذا الجدار ...
ليقينا من النار .

توب يقول...

تطلع ح تنزل ح أجيبلك جمااااال
ههههههههههههه

الغاردينيا يقول...

ههههههههه

حلوووووة

سمعتها بفيديو عاليوتوب

وحبيتهاااا كثير

تحية ,,